Nainget a maipatpatungpal ita ti ” No cellphone inside the classroom” idiay Twinpeaks National High School idiay Tuba, Benguet.
Sigun kenni Florence Pawig , School Head ti nasao a pagadalan, adan ti previous arrangements dagitoy kadagiti naglabas a tawen no sadino maiparabaw ti selpon dagiti estudyante iti lamisaanda ket ita, adadda nga ingetanda daytoy.
Sigun kenkuana, sakbay nga umuneg dagiti estudyante ken mannursuro kadagiti klasrum dagitoy, ibatida pay nga umuna dagiti selpon da iti ‘cellphone rack’.
Inlawlawag met ni Pawig a maalada laeng ti selpon da tunggala recess, break, wenno kalpasan ti klase dagitoy.
Malaksid iti dayta, agtultuloy met ti boluntaryo a panagkapkapda kadagiti estudyante iti gate ti pagadalan.
Sigun iti School Head, apaman a naipaulog ti memo, dagos nga inyemplementarda daytoy no sadino kadawyan kadagiti nakumpiskarda iti umuna nga aldaw ket dagiti moma.
Nupay kasta, kadagiti sinmarsaruno nga aldaw nga implementasyon dagitoy ket awan metten ti naalada manipud kadagiti estudyante kadagiti banag a maiparit a maitugot iti uneg ti pagadalan.
Personal metlaeng nga imonmonitor ni Pawig dagiti klasrum dagitoy ken dinakamatna a mabambantayan met ti overall wellness kas iti mental health dagiti estudyante. //via Bombo Noveh Organo.
