BAGUIO CITY – Balligi a naipatungpal ti agricultural intermarket a napauluan ti North meets South idi kalman sadiay Km. 5, La Trinidad, Benguet.
Nailako iti intermarket ti 19 a tonelada ti sadiwa a prutas a nagtaud sadiay Mindanao kas iti marang, durian ken pomelo.
Nailako ti marang ken durian iti P100 tunggal kilo ken ti pomelo iti P105 tunggal kilo.
Inlawlawag ni Raymond Peter Esperas, Development Management Officer III ti Mindanao Development Authority a saanda a nakailako iti rambutan ken lanzones gaputa naapektaran ti apit dagiti mannalon sadiay Mindano gapu iti panagtutudo.
Nagbalin nga organisado ti panakaipatungpal ti aktibidad babaen iti panagtitinnulong dagiti organizers, lokal a gobyerno ti La Trinidad, dagiti vendors ken dagiti kostumer.
Immunan a kinuna ni Valdred Olsim, Municipal Tourism Officer ti La Trinidad a kalpasan ti panakailako sadiay dagiti prutas manipud Mindanao ket mailako met sadiay Mindanao dagiti nateng nga agtaud sadiay Benguet. (-with Bombo Nikki Agsiweng)
