BAGUIO CITY – Simmuko ti maysa a miembro ti New People’s Army (NPA) kadagiti otoridad sadiay Poblacion Gangal, Sallapadan, Abra.
Daytoy ket maysa a baro nga agtawen iti 22, residente ti Brgy. Ud-udiao, Sallapadan, Abra ken miyembro ti Kilusang Larangang Gerilya (KLG) North Abra.
Simmuko daytoy kenni Mayor Nenita Mustard Cardenas iti presensiya ti sumagmamano a kameng Police Regional Office Cordillera ken militar sadiay Sadag Patrol base, Sitio Sadag, Brgy Maguyepyep.
Ti nasao rebelde a grupo ket addaan iti operasyon iti probinsya ti Abra ken posible a dagitoy ti responsable iti serye ti panagraut ken harassments a napaspasamak sadiay ken kadagiti kabangibang a probinsya.
Iti panakiuman ti pulisya iti daytoy, kinunana a simmuko daytoy gapu iti saan a napintas a pagalagadan ti grupoda ken gapu iti botengna iti agtultuloy nga opensiba nga ipatpatungpal ti pwersa ti gobyerno.
Kinunana a nakapasar daytoy iti rigat iti sidong ti organisasyon dagitoy isut gapuna a mas pinilina ti sumuko ken agnumar iti oportunidad a maipapaay kadagiti rebelde nga agsubsubli iti gobyerno.
