Ita a panawen, karbengan dagiti couple a mangipatungpal ti bukkodda a regulasyon iti aldaw ti kallaysa.
Karaman ditoy ti saan a panangitugot dagiti bisita kadagiti annakda ken ti panang-iddepda iti cellphone bayat ti seremonya.
Maiparit metlaeng ti panagparammag dagiti dumar-ay a bisita gapu ta saan a para kadakuada ti okasyon nu di ket para iti agkasar.
Idiay New Jersey, United States of America, nakaawat iti negatibo a komento manipud iti netizens dagiti agasawa a da Emerson ken John Schiavone gapu ta maibagbaga nga isuda ti addaan ti pinaka-demanding ken controversial rules idi nagkallaysada idi napan a tawen.
Daytoy ket kalpasan nga impablaakda ti maysa a video idi Abril 14, 2024 a napauloan ti “Controversial things we did for our 2023 wedding” nu sadino nasken a ti regalo nga ipaay dagiti dumar-ay a bisita iti kallaysada ket kwarta ken saan a physical gifts.
Sigun kadagiti agasawa, praktikal daytoy gapu ta kasapulanda ti kwarta nu idilig kadagiti materyal a regalo a posible a saanda met a maaramat.
Imparitda metlaeng ti panagrequest dagiti bisita ti kanta a maipatukar iti reception, “this is not prom, this is a wedding,” sigun kenni Emerson.
Malaksid iti daytoy, saanda a pinastrek iti venue dagiti bisita a naladaw gapu ta daytoy metlaeng ti pagannurutan ti agtagikua iti venue.
Maibasar pay kadagiti dadduma a videos nga impablaak dagiti agasawa, isudan ti immasideg iti tunggal lamisaan para iti picture-taking.
Naparitan pay dagiti single friends dagitoy nga agitugot ti barkada, nobya wenno nobyo, asawa ken dadduma pay.
Nagala dagiti couple ti security tapno nainget a maipatungpal dagiti nadakamat a pagannurutan.
Sika, ka-bombo, anya met dagiti ipatungpal mo a pagannurutan nu dumteng ti aldaw a makiasawa ka?
