BAGUIO CITY- Nainget a maipatungpal latta dagiti pagalagadan kontra COVID19 iti panakairugi ti examination para kadagiti interesado nga agbalin a kadete ti Philippine Military Academy ita nga aldaw.
Sigun kenni Major Vergel Lalangan, Director ti Office of the Cadet Recruitment and Admission ti PMA, agpaut ti eksaminasion agingga inton Setyembre 26, Domingo.
Kinunanana a dumanon iti 1,400 ti naawatda nga online aplikasion ngem posible a manamnama daytoy kalpasan nga agawatda iti walk in applications inton Setyembre 25 ken 26.
Dinakamatna a dumanon iti 700 nga examinees ti posible nga awatenda tunggal cluster, nangatngato no idilig iti 400 examinees nga in-akomodarda tunggal cluster idi napan a tawen.
Innayonna a nasken a mangiparang dagiti examinees iti birth certificate, kaudian a grado, 2×2 picture ken medical certificate bayat a dagiti examinees manipod iti ruwar ti siudad ket nasken nga agrehistro iti hdf.baguio.ph ken mangiparang iti vaccination card wenno negatibo nga nga RT PCR test ken test permit kas maitunos iti paglintegan ti siudad.
Maipalagip a nangrugi a nangrugi ti Nationwide PMA Entrance Examination idi Setyembre 2 ken agleppas inton October 3 no sadino immunan a nakaipatungpal iti entrance examinations dagiti 30 nagduduma a centers iti intero a pagilian.
Maipalagip pay a daytoy ti maikadua a tawen ti napabaruan a sistema ti eksaminasion ti PMA nga intunda ti agdama a pandemya no sadino nabingay daytoy iti upat a clustering a maipatungpal iti las-od ti uppat nga aldaw manipud iti sigud a maysa nga aldaw.
Nangilukat pay ti akademya kadagiti testing areas iti dadduma a rehiyon tapnu maakomodar dagiti examinees a saan a makastrek ditoy siudad ti Baguio.
Maibasar iti datus ti PMA, dumanon iti 37, 718 online applicants ti naawat ti akademya no sadino 16, 930 a cadet aspirants ti nagalan iti eksaminasion.
