BAGUIO CITY – ‘Milagro’ para iti maysa nga OFW sadiay Beirut, Lebanon ti panakaispalna manipud iti napasamak a dakkel a panagbettak sadiay a nagresulta iti panakadangranna.
Iti interview ti Bombo Radyo Baguio kenni Bombo International Correspondent Mercy Mustera, maysa kadagiti OFWs a nadangran iti insidente ken tubo ti Malinao, Albay, kinunana a nakaturog daytoy iti silidna idi killaat a nariing gapu iti nangngegna a napigsa a kanalbuong.
Natan-awanna ti maur-uram a warehouse agingga a nariknana ti napigsa nga epekto ti simmaruno a panagbettak a nagresulta iti panakabuong dagiti kagawaan iti balay ti amona.
Natumba ken nadangran ti ulo, rupa ken dadduma pay a paset ti bagina no sadino, adu a dara ti nagsayasay kenkuana a nagresulta iti panagkapsotna.
Ginandatna ti agpatulong ngem napaay laeng gaputa agpam-panic dagiti tattao isut gapuna a daytoy a mismo ti nangiyaplikar ti first aid kadagiti sugatna babaen iti panyo ken danum.
Pinagyamananna met ti panangiturong ti amona kenkuana iti ospital nupay napasamak ti panagpa-ospitalna iti kabigatan ti insidente gapu iti panakapunno dagiti ospital sadiay.
Kagiddan iti daytoy, iyap-apela ni Mustera ti panangtulong ti gobyerno ti Pilipinas kadagiti OFWs a nabiktima iti insidente gaputa iti agdama ket hotline laeng ti embahada ti naipaay a kontaken dagitoy.
Innayonna nga adu a Pilipino a nadangran iti insidente ti saanen a nagpa-agas iti ospital gaputa saanda a kabaelan nga agbayad.
