BAGUIO CITY – Dukduktalen dagiti otoridad ti motibo iti panakapapatay ti maysa nga Overseas Filipino Worker sadiay Santiago St., Zone 7, Bangued, Abra idi malem kalman.
Nabigbig ti biktima a ni Amor Acan Fernandez, 50, naasawaan, tubo ti Brgy. Bacooc, Lagangilang, Abra ken residente ti Linasin Zone 1, Bangued, Abra.
Maibasar iti imbestigasyon ti Bangued Municipal Police Station, daldalyasaten ti biktima ti nasao a kalsada babaen iti kotse daytoy idi pinalpaltogan ti riding in tandem a dagus a naglibas kalpasan ti insidente.
Intaray met dagiti pulis ti biktima iti Seares Memorial Hospital gapu iti sinagrap daytoy a tama iti kannigid a paset ti ulona, kannigid a paset ti tengngedna ken iti kannigid nga abaga daytoy.
Nupay kasta, pimmusay ti biktima bayat ti panakaipasidong daytoy iti medical treatment.
Narekober met iti uneg ti kotse ti biktima ti maysa a firearm box a naglaon iti maysa a caliber .45, ken tallo a magazine assembly ti caliber .45 nga addaan iti lima a bala.
