BAGUIO CITY – Agingga iti agdama ket adda iti state of shock ti Pinay worker a nakaimatang ken nakaala iti video iti napasamak nga aksidente sadiay Singapore a nakatayan ti dua nga OFW ken nakadangran ti uppat a dadduma pay.
Sigun kenni Nora Galla Dapuyen Bua-ay, tubo ti Kalinga ken nasurok masya a dekadan nga agtatrabaho sadiay Singapore, agingga ita ket saan pay daytoy a mamati iti napasamak.
Kinuna a maysa koma daytoy a karaman kadagiti nadungpar ti lugan no saan a pinilit ti kadwana a pumanaw iti mall sadiay Lucky Plaza a nakapasamakan ti insidente.
Sigun met kenni Margie Butardo, tubo ti Bani, Pangasinan ken maysa metlaeng kadagiti OFW sadiay Singapore, saana a mailadawan ti nakaam-ames nga insidente.
Innayona a kadawyan a pagu-urnongan dagiti Pilipino ti Lucky Plaza Hotel nangruna iti Dominggo a Day-off ti kaaduan.
Maipalagip a pimmusay ti dua kadagiti ennem a dinungpar ti senior citizen a driver ti lugan.
Nabigbig dagiti pimmusay a da Arlyn Nocus, tubo ti Caba, La Union ken ni Abegail Leste ti Tuguegarao City bayat a kritikal ti kondisyon da Edna Limbaoan ti Isabela ken ni Arcely Nocus a kabsat ti maysa a kadagiti pimmusay ken under observation da Demet Limbaoan ken Laila Laudencia a tubo ti San Fernando City, La Union.
