BAGUIO CITY – Agtaltalinaed a normal ti sitwasyon ita iti pagilian nga Israel iti baet ti panangipatayab ti Gaza Strip iti adu a rockets paturong sadiay idi kalman.
Iti panakiyuman ti Bombo Radyo kenni Analyn Jeisrael Lachica manipud Aringay, La Union ken agtatrabaho ita kas caregiver sadiay Ashkelon, kinunana a nasayaat ken medyo kalmado ti sitwasyon iti lugar a pagtatrabahuanna.
Kinunana nga adu a rockets ti pinatayab ti Gaza idi kalman ngem awan ti naipadamag a nadangran.
Kinunana pay a natalged ti marikriknada gaputa amin a rockets paturong sadiay nga ipatpatayab ti Gaza a teritoryo ti Palestine ket main-intercept ti iron dome ti Israel.
Maibasar met iti palagip nga impaulog ti Philippine Embassy sadiay Israel idi kalman para kadagiti Pinoy sadiay, nailanad a kasapulan ti nainget unay a panag-annad para iti kinatalged ken pagimbagan dagitoy nangruna iti manarimaan a sitwasyon ti seguridad sadiay.
Ipalpalagip ti embahada ti panagbalin a naannad ken naridam dagiti Pinoy sadiay, ti panagliklik ken panangitantanda iti panagturongda kadagiti lugar nga asideg iti Gaza ken West Bank kas iti Bethlehem, Jericho, Hebron ken Golan Heights.
Ibilbilin pay ti emhabada ti panangitantan dagiti Pinoy iti panagsarungkarda kadagiti napeggad a lugar, ti saanda a panagasideg kadagiti security forces ti Israel a nakapwesto kadagiti sensitibo a lugar sadiay ken ti panagliklik dagiti Pinoy kadagiti lugar a pakaisaysayangkatan ti riribuk wenno protesta.
Nainget pay nga imbilin ti embahada ti panagtulnog dagiti Pinoy sadiay Israel iti amin a pammilin ti security forces ti nasao a pagilian ken ti panagkiddawda ti tulong no kasapulan.
