Nangipatungpal ti transport group a PISTON-Metro Baguio iti tignay-protesta idi kalman kas panangipakita iti panangkondenarda iti agtultuloy a panagngato iti presyo iti produkto a petrolyo.
Ti nasao a tignay ket indauloan ti presidente iti nasao a grupo a ni Mody Floranda.
Iti pakaiuman iti Bombo Radyo kenkuana,kinunana a dakkel ti epekto iti pagbiagan ken dakkel a mangparparigat iti kasasaad dagiti driver ken operator ti agtultuloy nga oil price hike.
Iti patta-patta ni Floranda, agarop ₱900 ti dagus a mapukpukaw iti pamastrekan dagiti driver iti tunggal aldaw nu makabusbosda iti 30 a litro iti gasolina para iti panagpasada dagitoy.
Kunana nga nu ar-arigin ket nasurok ₱30,000 ti mapukpukaw iti pamastrekan dagitoy iti 25 nga aldaw a panagpasadada — gatad a dakkel koman a makatulong kadakuada iti panangsuporta iti pamilya ken kasapulanda.
Maipalagip a kadagiti nagsasaruno a tallo a lawas iti agdama a bulan ket napasamak dagiti major oil price hike nu sadino dimmanon pay ti nasurok a piso ti ngimmatwan dagiti produkto a petrolyo.
Ita a lawas,naipaiyulog ti pakaammo a sabali manen nga oil price hike ti mapasamak partikular iti Diesel ken Kerosene.//Bombo Rob Dominguez
