Imbilin ti Office of the Ombudsman ken da Justice Secretary Jesus Crispin Remulla, Interior Secretary Jonvic Remulla, Philippine National Police (PNP) chief Rommel Marbil ken dua a dadduma pay tapno sungbatan ti kriminal ken administratibo a reklamo kontra kadakuada nga impila ti Senate panel babaen ti pnangidaulo ni Senador Imee Marcos nga adda pakainaiganna iti pannakakemmeg ni sigud a President Rodrigo Duterte.
Iti nagsina a pammilin, kinuna ti Ombudsman a dagiti agkabsat a Remulla, ni Marbil, kasta met da PNP Criminal Investigation and Detection Group Director Major General Nicolas Torre III ken Special Envoy on Transnational Crime Markus Lacanilao ket rumbeng a mangipila ti counter affidavit iti reklamo a kriminal ken administratibo iti uneg ti sangapulo nga aldaw manipod idi impaay ti Ombudsman ti pammilin.
Sigun iti Ombudsman, ti saan a panangipila iti Counter-Affidavit iti uneg ti nadakamat nga aldaw ket maibilang a panangiwaksi iti karbengan dagiti respondents a mangisubmitir kadagiti ebidensia ken posible a maituloy ti umuna nga imbestigasion.
Nagtaud ti pammilin ti Ombudsman iti kiddaw ni Senador Imee Marcos nga imbestigaren ti Ombudsman dagiti opisial a nairaman iti panangtiliw kenni sigud a President Duterte babaen ti International Police idi Marso.
Kinunana a mabalin a sungbatan dagiti opisial ti graft, grave misconduct, usurpation of judicial functions, ken arbitrary detention, ken dadduma pay.
Iti agdama, awan pay ti sungbat dagiti nasao nga opisial iti reklamo a naipila kontra kadakuada.
