BAGUIO CITY – Nagballigi ni Igorot mix martial arts (MMA) champion Geje Eustaquio a mang-unify wenno mapagtipon ti dua nga ONE Flyweight Champion titles iti co-main event ti ONE: Pinnacle of Power a naangay sadiay Macau idi rabii ti Sabado.
Iggem ni Eustaquio ti Interim ONE Flyweight title bayat nga iggem met ni Adriano Moraes ti ONE Flyweight title.
Inabak ti Igorot fighter ni Moraes babaen iti split-decision no sadino, binigbig ken impaayan puntos dagiti judges ti kontrol ken ground-and-pound performance ni Eustaquio no idilig iti striking ken submission attempts ni Moraes.
Maipalagip nga immunan nga inabak ni Moraes ni Eustaquio idi September 2014 babaen iti submission.
Inladawan met ni Eustaquio nga ‘awesome’ ti panangabakna iti post-fight interview kenkuana.
Kinunana nga arigna imposible nga agbalin daytoy a kampeon idi mangrugrugi iti mix martial arts, sangapulo ket uppat a tawen ti napalabas ngem iti panaglabas ti tawen ket nagbalin a rason laengen ti pannarita nga ‘imposible’.
Innayonna nga uray asino ket mabalin nga agbalin a world champion la ketdi desidido daytoy.
Kabayatanna, naabak ni Igorot MMA fighter Edward Kelly iti labanda kenni Narantungalag Jadambaa babaen iti technical knockout iti round 2 bayat a nangabak met ni Igorot MMA fighter Danny Kingad iti labanda kenni Ma Hao Bin babaen iti unanimous decision.
