BAGUIO CITY-Manarimaanen ti panagsagsagana ni ONE Championship Interim Flyweight World Champion Geje Eustaquio para iti umadani nga unification bout ken rematch-da kenni reigning ONE Championship Flyweight World Champion Adriano Moraes.
Immuna iti daytoy, intuding ti ONE Championship ti panaglaban manen da Moraes ken Eustaquio kalpasan ti uppat a tawen para iti panagtipon ti 56.8 kilograms category ti nasao nga MMA promotion.
Maipalagip a nagun-od ti Igorot MMA fighter ti interim flyweight belt kalpasan nga inabakna ni Kairat Akhmetov idi Enero bayat a nabaelan ni Moraes a mangidepensa iti titulona kontra kenni Team Lakay player Danny Kingad.
Iggem ni Moraes ti record a 17 wins, 2 losses bayat nga iggem ni Eustaquio ti record a 10 wins, 6 losses ken immuna a naglaban dagitoy idi 2014 para iti inaugural flyweight crown ngem nangabak ni Moraes.
Agserbi ti rematch dagitoy a co-main event iti ONE: Pinnacle of Power a maangay inton June 16 sadiay Beijing, China a pakaitampokan ti laban a pangidepensaan ni ONE Women’s Strawweight World Champion Xiong Jing Nan iti titulona kontra kenni Laura Balin ti Argentina.
