BAGUIO CITY – Ipangruna ti Team Lakay ti kinatalged dagitoy manipud iti corona virus disease – 2019 wenno COVID-19 kabayatan ti panagnalinaedda sadiay Singapore ita a lawas para iti naituding a laban ni sigud a ONE Featherweight World Champion Honorio “The Rock” Banario inton Biyernes, February 28.
Makasango ti Team Lakay veteran MMA fighter iti featherweight division ti ONE: King of the Jungle ni Shannon Wiratchai ti Thailand.
Iti panakiyuman ti Bombo Radyo, kinuna ni Banario nga agtalekda kenni coach Mark Sangiao a protektadoda manipud iti COVID-19 sadiay gapu iti kapabilidad ti gobyerno ti Singapore nangruna ti napintas ken napartak nga aksyon dagitoy kontra iti nasao a virus.
Dinakamatna a kas pangsalwad iti bagida ket agaramatda iti face masks ken dadduma pay a wagas tapno masalwadan ti salun-at ken bagida.
Naamuan nga addan da Banario ken Sangiao sadiay Singapore ken naipasidongdan iti check-up iti ospital sadiay sakbay ti panagturongda iti pagdagusanda kabayatan ti kaaddada iti nasao a pagilian.
Innayon pay ti Igorot fighter nga awan ti pagdanaganda kenni Coach Sangiao gaputa addan ti addang ti ONE Championship tapnu masalwadan dagiti fighters ken dagiti stakeholders.
Immunan nga inwaragawag ti ONE Championship a saan a mailukat ti event kadagiti fans ken iti media ken mabuya laengen dagiti laban babaen iti social media.
Kabayatanna, dinakamat ni Banario a siento porsiento a nakasaganan daytoy iti labanna nangruna ta idi paylaeng napalabas a tawen a nakigidgiddan a nagkondisyon kadagiti kakadwana iti Team Lakay.
Innayon ti wushu stylist a siento porsiento daytoy a nakasagana iti panagsublina manen iti featherweight division kalpasan ti panagakarna iti lightweight division.
