Nangipaay ti Department of Health idi laeng kalman ti online counseling sessions para kadagiti agarup 60 a Pilipino idiay Israel gapu iti napasamak a tension iti nagbaetan ti Iran ken Israel.
Kinasarita ti nasao nga ahensia dagiti mental health experts manipod iti Mental Health and Wellness General Hospital tapno mangipaay ti psychological debriefing ken first aid para kadagiti distraught overseas Filipinos.
Sigun kenni Health Secretary Teodoro Herbosa, ti Department of Health ket adda laeng iti likudanda tapno tumulong kadagitoy uray nu addayoda.
Ginuyugoyna pay dagitoy nga agtalinaed a napigsa, naridam ken kitaenda ti tunggal maysa.
Ikarkararag pay ti nasao nga opisial ti kinatalged ken kinatalna ti nasao a pagilian.
Maipalagip nga immanamong ti sumagmamano a Pilipino nga agsubli iti Pilipinas babaen iti repatriation program ti gobierno, ngem adda latta dagiti Pilipino a kayatna ti agtalinaed idiay Middle East iti baet nga agtultuloy ti tension sadiay.
Maibasar iti datos ti Department of Foreign Affairs , dumanon iti agarup 30,000 a Pilipino ti mangmangged idiay Israel, bayat a 1,200 met ti adda sadiay Iran.
