BAGUIO CITY – Agtultuloy a naka-blue alert ti operations center ti Cordillera Regional Disaster Risk Reduction and Management Council (CRDRRMC) gapu iti mapaspasaran a panagtudo iti rehion.
Sigun kenni Franzes Ivy Carasi, information officer ti Office of the Civil Defense – Cordillera nga agserserbi a secretariat ti CRDRRMC, babaen iti daytoy ket maisigurado ti nainget a panangbantay dagiti member agencies, nangruna dagiti lokal a gobyerno iti sitwasyon iti masakupan dagitoy.
Kagiddan iti daytoy, inyunay-unayna manen ti panagbalin nga alerto ti publiko nangruna ta saan nga ammo no kaano a sumardeng ti tudo.
Kinunana a nasken nga i-assess ti DRRM Council dagiti lokal a gobyerno no anya ti nasken nga aramidenda kas iti precautionary measures iti masakupan dagitoy.
Innayonna pay a nasken nga agsagana amin a maseknan tapnu nakasagana dagitoy iti aniaman nga insidente a mabalin nga itunda ti agdama a kasasaad ti panawen.
