BAGUIO CITY -Ipalpalagip manen ti Mines and Geosciences Bureau (MGB) – Cordillera nga agtaltalinaed a maiparit ti operasyon ti small scale mining iti rehion.
Impalagip daytoy ni Engr. Alfredo Genetiano, dadaulo ti Mine Management Division ti MGB-CAR kasaruno dagiti report a naaw-awatda nga agtultuloy paylaeng ti iligal nga operasyon ti sumagmamano a pocket miners sadiay Itogon.
Maipalagip a naiparit ti small scale mining iti rehion idi 2018 kalpasan ti panagreggaay ti daga sadiay Barangay Ucab a nakatayan ti nasurok 100 a tattao a kaaduanna ket minero.
Inyunay-unayna a maawatanda met iti arungaing wenno rason dagiti minero no apay nga agtultuloy paylaeng ti operasyonda nangruna ita nga pandemya.
Nupay kasta, impettengna a nasken nga agaplikar laengen dagitoy para iti Minahang Bayan tapnu tapnu agbalin a lehitimo ken legal iti operasyon dagitoy.
Naamuan kenkuana nga adda ti walo a parcel ti daga nga inaplikaran ti nasurok 40 nga asosasyon dagiti minero sadiay Itogon para iti Minahang Bayan ngem naibasura kalpasan a naduktalan a sakopen daytoy ti watershed protected areas ti munisipyo,
Iti agdama, 11 ti naideklara a Minahang Bayan iti Cordillera a bukbuklen ti sag-uppat iti Apayao ken Benguet ken saggaysa iti Abra, Mountain Province ken Kalinga.
