BAGUIO-Maipalubosen ti operasyon dagiti computer shops sadiay La Trinidad, Benguet.
Sigun keni Vice Mayor Roderick Awingan, daytoy ti napagnumuan ti Municipal Inter-Agency Task Force on COVID-19 ngem masapul a suruten wenno ipatungpal dagiti computer shops dagiti minimum health standards nga itudtuding ti linteg para iti agdama a community quarantine gapu iti COVID-19 pandemic.
Kinunana a dagiti mapalubusan kadagiti computer shops ket dagiti indibidual nga addaan ti napateg a research ken dagiti agpa-imprenta.
Inyunay-unayna a maipawil paylaeng dagiti agay-ayam kadagiti computer shops nangruna dagiti menor de edad.
Impasiguradona nga apaman nga adda dagiti computer shops a maduktalan nga aglabsing iti paglintegan ita ket dagus a maiparikep dagitoy.
Kabayatanna, dinakamat ni Vice Mayor Awingan a nailukaten ti Wangal Sports Complex iti alas singko agingga iti alas siete ti agsapa para kadagiti ag-ehersisyo ngem nasken a masurot dagiti maitudtuding a public health standards.
Immapela pay daytoy kadagiti umili ti La Trinidad, Benguet iti panangitedda latta iti kooperasion ken disiplinada tapnu maliklikan ti panagwaras ti COVID-19 sadiay.
