BAGUIO CITY – Balligi ti Operation Baklas kadagiti iligal a campaign materials ditoy siudad nga indauluan ti COMELEC-Baguio idi agsapa.
Iti panakiyuman ti Bombo Radyo kenni Baguio City Election Officer Atty. Vanessa Faye Hangdaan, kinunana nga adu ti nabaklasda a campaign posters a naikonsidera nga iligal gapu iti panaglabsing dagitoy iti nagduduma a pagalagadan ti komisyon.
Dinakamatna a kaaduan a posters nga inikkatda ket dagiti naikabil kadagiti saan nga umno a lugar, kas iti government properties wenno aniaman a tagikua wenno kagawaan ti gobyerno.
Innayonna nga adda met dagiti posters nga inikkatda gaputa dakkel unay dagitoy a saan a maitunos iti naituding a kadakkel dagiti campaign materials.
Sigun pay kenni Atty. Hangdaan, binaklasda metlaeng dagiti campaign materials nga agkurkurang iti impormasyon kas iti detalye ti nangidonar wenno ti pulitiko ken ti maikalkalikagum a panakailanad ti ‘paid for by’ wenno ‘paid by’.
Naituding a maipasidong iti imbentaryo dagiti nabaklas a campaign materials nga adda ita iti ikot ti COMELEC-Baguio.
Naisayangkat ti panagbaklas iti panagbinnadang ti komisyon, ti pulisya ken ti Department of Public Work and Highways.
