Naitung inton bigat, Hunio 4 agingga 5 ti umuna nga opisial a panagbisita ni Singaporean Prime Minister Lawrence Wong iti Pilipinas, kasaruno ti imbitasion manipod kenni President Ferdinand Marcos Jr.
Maangay inton bigat ti bilateral talks ti dua a dadaulo nu sadinno, manamnama a pagtalantananda ti relasion ti Pilipinas ken Singapore, ti maipapan ti salun-at, climate change mitigation, civil service cooperation, ken dadduma pay.
Malaksid iti dayta, manamnama pay a pagtalantananda ti maipapan ti political ken economic issues iti rehion, sigun iti Presidential Communications Office.
Ti panagbisita ni Singaporean Prime Minister Wong ket kasaruno ti panagkinnitada kenni President Marcos Jr. ken dadduma pay a Southeast Asian leaders idi napalabas a lawas bayat ti maika-46 nga ASEAN Summit idiay Kuala Lumpur, Malaysia.
