Naipaayan iti siam a pulo nga aldaw a preventive suspension ti maysa a kapitan, uppat a barangay kagawad ken ti Sangguniang Kabataan chairperson idiay Barangay Calaba, Bangued Abra, gapu iti kontrobersial a pakdaar maipapan iti pagannurotan ti panagibelleng iti basura nga addaan iti ladawan iti paltog.
Maibasar iti anunsio iti tarpaulin, P1,000 ti first offence idinto a P1,000 ken walo nga oras a community service ti second offence, bayat a mangipakita ti ilustrasion iti paltog ti maikatlo a panaglabsing, no sadino sumagmamano a residente ti nangipila ti reklamo kontra kadagiti nasao nga opisial, agsipudta katupag ti retrato ti paltog ti pangta iti biag ken kaipapananna ti pammapatay.
Dagus met nga inlibak daytoy dagiti opisial, bayat iti panagimbestigar ti municipal council ita nga aldaw.
Sigun kenni Eric Astudillo, Sangguniang Barangay Secretary ti nasao a barangay, naipaay ti preventive suspension tapno saan a maimpluensiaan dagiti saksi ken tapno masalakniban ti integridad dagiti rekord ken dadduma pay a dokumento maipapan iti nasao a kontrobersial.
Iti agdama, ti 1st Kagawad ti nangala iti pagrebbengan ti nasuspende a Kapitan ken sumangsango dagitoyen ti kaso a grave misconduct, grave abuse of authority, gross neglect of duty, gross dishonesty, ken conduct prejudicial to the best interest of the service.
