Nangrugin ti panakaipatungpal iti “Oplan Baklas” ita nga aldaw kadagiti nagduduma a lugar iti paglian.
Babaen iti nasao a tignay ket maikkat dagiti campaign materials a saan a maitunos iti naipaay a pagalagadan kas iti saan nga umno a rukod iti poster, panakaidisplay dagitoy kadagiti saan a common poster areas, ken panagaramat kadagiti non-biodegradable a materyales para kadagiti poster.
Iti agdama, dagiti paylaeng campaign materials dagiti senatorial aspirants ken partylist representatives ti mabalin a mabaklas gapu ta saan pay a nangrugi ti campaign period para kadagiti lokal a posisyon.
Malaksid iti dayta,saan a baklasen dagiti otoridad dagiti poster a nakaimuntar kadagiti pribado a lugar idiay Manila.
Imbinglay met ni Commission on Elections Chairman Atty. George Erwin Garcia a temporaryo nga idulin ti poll body dagiti mabaklasda a posters ken saanda a dagus nga uramen gapu ta kasapulan dagitoy a mai-account ken maidokumento.
Innayon ti opisyal a saan a dagus a madiskwalipikar dagiti aglabsing a kandidato nu di ket maipaayanda iti show-cause order.
Kaspangarigan iyaling-alingda ti show cause order ken agtultuloy latta a saanda nga agtulnog iti pagalagadan, mabalin a mapilaan iti kaso dagiti kandidato ken posible a madiskwalipikar dagitoy.
