Inyunay-unay ti Police Regional Office Cordillera (PROCOR) a saan a panaglabsing iti press freedom ti resolusyon ti Regional Law Enforcement Coordinating Committee (RLECC) ti PROCOR a panakaipatungpal ti Oplan Tokhang kadagiti nabigbigda a left-leaning personalities iti gobierno, media ken dadduma nga entities.
Iti interview ti Bombo Radyo Baguio, inlawlawag ni PCapt. Marnie Abellanida, panakangiwat ti PROCOR a saan a mapunpuntirya dagiti kameng ti media ken dadduma nga entities gaputa karbengan ti tunggal maysa a mangipeksa iti bukodda a kapanunutan.
Kinunana a sakbay ti Tokhang ket maisayangkat pay ti serye ti panagberipikar ken panagurnong ti impormasyon tapnu awan ti malabsing a karbengan.
Dinakamatna a normal laeng nga adda dagiti mangkontra iti gobierno ngem saan a nasayaat no aramaten dagiti nasao a personalidad ti nagan wenno bileg dagitoy a mangguyogoy kadagiti agtutubo a makikappeng kadagiti makakanigid a grupo.
Impettengna pay nga awan ti nasken a pagbutngan dagiti kameng ti media iti nasao a resolusyon no awan met ti ar-aramiden dagitoy a maikaniwas iti linteg ken no saanda a kameng dagiti maka-kakinigid a grupo.
Inyunay-unay ni Capt. Abellanida a napintas ti intension ti resolusyon gaputa nakappia daytoy a wagas iti panangallukoyda kadagiti umili nga agaramid kadagiti napipintas a banag.
Kabayatana, pinagyamananna met ti media iti lokalidad ken kinunana a maysa dagitoy kadagiti kabinnadang ti pulisya iti nagduduma a kampanya dagitoy.
