Inlawlawag ni Baguio City Councilor Atty. Paolo Raynor Salvosa ti maipapan iti isingsingasing na ita a baro nga ordinansa wenno ti Baguio City Administration Demolition Regulation Ordinance of 2026.
Iti pannakiuman ti Bombo Radyo kenni Councilor Salvosa, inlawlawagna a nakitana a kaaduan iti oras ken resources ti lokal a gobyerno ti siudad ti Baguio ti mabusbusbos para kadagiti private land disputes iti siudad idinto ta mabalin a mapagtungtongan daytoy idiay korte.
Sigun kenkuana, naobserbaran a kasla maar-aramaten ti demolition order para iti private interest tapno laeng maisubli dagiti daga kadagiti claimants.
Innayon na pay nga agarup kagudua iti oras ti City Buildings and Architecture Office – Baguio City ti maipapaay kadagiti nasao a kaso, rason tapno saan a maikan ti umdas nga atensyon dagiti dadduma pay nga issues iti siudad.
Sigun pay kenni Councilor Salvosa, no gamin ti city hall ti mangigem kadagiti nasao a kaso, awan ti bayadan ti publiko. Gapu iti daytoy, mabusbos ti oras ken resources ti siudad para kadagiti nasao a kaso nangnangruna ta umad-addon ti kaso ti private-private land disputes iti siudad.
Gapu iti daytoy, insingasing ni Councilor Salvosa ti Demolition Regulation Ordinance no sadinno panggep daytoy a maregulate nu kaano a mabalin a talantanen ti lokal a gobyerno ti siudad dagiti private disputes.
Umuna iti amin, inlawlawag ni Councilor Salvosa a kasapulan nga adda iti pammaneknek dagiti karaman nga indibidual nga inrugidan ti kaso para iti recovery of possession. Ditoy metlaeng nga impakaammo ti nasao nga opisyal a saan nga agi-is-isyu ti lokal a gobyerno ti siudad iti order panggep iti recovery of possession wenno tapno maiisubli ti possession ti daga iti claimant.
Kanayunanna, kasapulanen nga agbayad da. Sigun kenni Councilor Salvosa, pribado a pakaseknan dagiti disputes ngem nakitana a dakkel a resources ti city gall ti naararamat tapno libre a maiyurnos dagiti private land disputes idinto ta mabalin met a iyumanda daytoy idiay korte.
Maikatlo, inlawlawag ni Councilor Salvosa a nu met maipapan kadagiti legitimate informal settlers a sigun kenkuana, saan a kasapulan nga indigents, masapul a mapagtungtongan ken kitaen nga umuna dagiti proposed relocation site para kadakuada.
Impetteng ti nasao nga opisyal a dagitoy dagiti banbannag a kasapulanda a tarimaanen tunggal adda maisayangkat nga administrative demolition.
Inyebkas ni Councilor Salvosa a sapay kuma ta paset laeng ti iskedyul ken resources ti city hall ti mabusbos para kadagiti kaso ti land disputes ken dagiti kitdi maipriority ket dagiti watersheds, waterways, ken dadduma pay a public interest ti iti siudad ti Baguio.
Ti nasao nga singasing ket mangrugin a matalantan iti panangidaulo ni Councilor Peter Fianza kas dadaulo ti Committee on Lands and Housing.
Guyguyugoyenna met ti publiko a makipaset kadagiti diskusyon kas kadagiti public consulatations ken panagtalantan tapno agbalin a nainkalintegan ti proseso ti nasao a singasing. //bombokaren.c.sapirao
