Nainget nga ipatpatungpal ti Barangay San Roque ti ordinansa kontra road obstruction tapno maksayan ti nailet a gunay ti trapiko ken mapagtalinaed a nalawa dagiti kalsada.
Iti pannakiuman ti Bombo Radyo, inlawlawag ni Brgy. Captain Ernesto Amon a mabalin laeng nga agpark iti igid ti kalsada dagiti lugan nga awanan iti parking space wenno garahe manipud alas-7 ti rabii agingga alas-6 ti agsapa.
“Adda barangay ordinance ko nga inaramid. Ti mabalin laeng nga agpark ket dagiti awan garahe na ken rabii laeng, 7PM-6AM. Pagkatapos, 6AM-7AM awanen ti nakapark” sigun iti Kapitan.
Nagballaag ti Kapitan a maiparit ti panagparada manipud alas-6 ti agsapa agingga alas-7 ti rabii, ken dagiti saan a sumurot ket matiketan babaen kadagiti pulis manipud iti Baguio City Police Office – Police Station 1.
Kabayatanna, sigun pay iti kapitan, problema metlaeng ti barangay dagiti natagari a motorsiklo ken napigsa a tambutso dagitoy.
Nupay kasta, agtultuloy met ti koordinasionda iti Police Station 1 para iti panangtiliw kadagitoy.
Sigun met iti Police Station 1, agtultuloy ti ronda dagitoy ket addan dagiti natiliwda gapo iti natagari a tambutso.//BomboKhey
