BAGUIO CITY – Maad-adal ita iti lokal a konseho ti singasing nga ordinansa para iti panakabigbig dagiti lugar iti sentro ti siudad ti Baguio nga agserbi kas baro a loading, unloading zones ken taxi stands.
Maibasar iti singasing nga ordinansa, 28 dagiti nabigbig mapagbalin a loading ken unloading zones bayat nga 18 dagiti mabalin a mapagbalin kas taxi stands iti deppar ti Central Business District.
Madutukan to ti City Engineering Office ken ti Traffic Enforceny Unit ti Baguio City Police Office a mangimuntar kadagiti kasapulan a signages kadagiti nabigbig a lugar.
Mamulta met iti P500 agingga P1,500 dagiti matiliwan a saan nga agtulnog iti nasao a linteg pakairamanan dagiti lugan nga agparada kadagiti nabigbig a taxi stands ken iti loading ken unloading areas.
Immuna iti daytoy, naisingasing metlaeng ti panaka-amyendar ti ordinansa a nangituding kadagiti taxi stands, pakairamanan dagiti loading ken unloading zones iti sentro ti siudad.
Nakiddaw pay ti panakailatang ti P100,000 para iti panaka-aramid dagiti pavements, signboards ken signages a maimuntar kadagiti mabigbig a taxi stands, loading ken unloading zones iti sentro ti siudad.
