BAGUIO CITY – Kinumpirmar ni Baguio City Mayor Benjamin Magalong a dumanonen iti 100% ti occupancy rate kadagiti pagagasan iti siyudad.
Sigun kenkuana, daytoy ket gapu iti agtultuloy a pannakailista ti nangato a kaso ti COVID-19.
Innayonna a ngimmato met ti kaso ti severe cases ti COVID-19 a matamtaming kadagiti ospital ken kadagiti step down facilities ti siyudad.
Iti baet daytoy, kinunana ti mayor nga ikagkagumaanda a mang-akomodar kadagiti amin a pasyente ti COVID-19 kadagiti isolation facilities ti lokal a gobyerno.
Dinakamatna a dumanon metten iti 70% ti occupancy rate kadagiti quarantine ken isolation facilities ti siyudad.
Malaksid iti daytoy, inaklon ti opisyal a ngimmato itan ti bilang dagiti naka-home isolation a saan a maakomodar kadagiti ospital kasaruno ti panagngato ti kaso ti nasao a sakit kadagiti pamilya ken pagtaengan.
Kabayatanna, impeksa manen ni Mayor Magalong ti panagamakna gapu iti agtultuloy a panagngato ti kaso ti COVID-19.
Sigun kenkuana, ngimmato iti 256 ti average case ti COVID-19 iti syudad, nangatngato no idilig iti 214 nga average case a nailista iti naglabas a dua a lawas.
Malaksid iti daytoy, kinunana a ngimmato iti walo ti average a bilang dagiti matmatay seknan iti COVID iti syudad manipud iti sigud a lima iti tunggal aldaw.
