Agpalapalagip manen ti Regional Highway Patrol Unit Cordillera seknan iti agraraira a technical carnapping iti rehiyon Cordillera nu sadino ti end user ket saan a mismo nga isu ti suspek iti panagtakaw nu diket adda ti middleman a karaman iti nasao a kaso.
Iti panakiuman ti Bombo Radyo kenni Regional Highway Patrol Unit Cordillera Chief Public Information Officer Police Captain Dindo Salming, dakkel ti bilang ti technical carnapping a mapaspasamak iti nasao a rehiyon.
Innayon pay ni PCPT. Salming a kadawyan a pakabikbiktimaan dagiti residente iti rehiyon Cordillera ket dagiti aggatgatang kadagiti lugan nga awanan iti umno a dokumento.
Binalakadanna dagiti Cordillerans a mabalinda latta nga apan kadagiti kaasitgan nga opisina ti Highway Patrol Group a kaasitgan kadakuada tapnu naan-anay a masukimat dagiti dokumento ti panggep dagitoy a gatangen a lugan.
Tapnu iti kasta ket saan dagitoy a mabiktima ken saan metlaeng a masayang dagiti kuarta dagitoy.
Mainaig iti dayta, ket adu latta dagiti gumatgatang kadagiti lugan a saan a nabaybayadan kadagiti nagduduma a bank institutions isu’t gapuna a ti end user ti agbayad iti daytoy ken adda pay ti posibilidadna a mabalin a guyuden wenno alaen ti bangko ti lugan a ginatang ti maysa nga indibidual gapu ta saan a nabayadan daytoy.
