Nagballag dagiti otoridad ti pagilian iti Publiko kontra kadagiti maidiaydiaya a trabaho iti maaw-awagan kas “Golden Tiangle” a pagaammo kas sentro ti illegal nga aktibidad iti Asia.
Kasaruno daytoy iti impablaak ni Philippine Amusement and Gaming Corporation OIC General Raul Villanueva nga agbirbiruk dagiti sigud nga agtatrabaho iti Philippine Offshore Gaming Operators (POGO) iti pagtrabuanda a POGO Hub kadagiti pagilian a paset ti “Golden Triangle” kas iti Thailand a mangipapaay iti nangat-ngato a sueldo.
Innayon ni Villanueva, nga ikagkagumaan dagiti sigud nga agtatarabaho iti POGO nga agbiruk iti pagtrabahuanda gaputa kaaduan kadagitoy ket addaan iti otang.
Gapu iti dayta, pagamkan ti nasao nga opisial a posible a mapan dagitoy iti “Golden Triangle a mabalin a pakaisadmakanda.
Malaksid iti dayta, nagballaag ti Philippine Amusement and Gaming Corporation, Department of Labor and Employment (DOLE) ken Presidential Anti-Organized Crime Commission (PAOCC) a posible a mabiktima dagitoy iti pananggabuso kas iti napasaran dagiti Chinese iti Lucky South 99.
Kabayatanna, kinuna ni Labor Secretary Bienvenido Laguesma a manarimaan ti pannakikoordinar dagitoy iti employers iti Internet Gaming Licensee (IGL) tapno matulungan dagiti agarup tallo pulo a ribu a naapektaran iti pannakaiparit ti POGO iti pagilian.
