Nakargaanen iti bubong ti maysa a portion ti maar-aramid nga overpass sadiay Km. 5 La Trinidad, Benguet.
Naituding met nga agleppas ti panakaaramid daytoy inton June 8, 2025.
Maipalagip nga iti panakiuman ti Bombo Radyo kenni Jupiter Bacaoat, Engineer 2 iti Department of Public Works and Highways, Benguet 1st District, impanamnamana nga agleppas ti nasao nga overpass iti aldaw ti naituding a pannakaileppas daytoy.
Ti panakaaramid ti overpass ket naiggedan iti reblocking a maipatpatungpal iti kalsada ti La Trinidad a manipud Stobosa ti Km.3 aginnga Km.5.
Gapu iti dayta, mapaspasaran dagiti motorista ken pasaheros ti nailet a gunay ti trapiko no sadino makidkiddaw ti panakaawat ken kooperasyon ti publiko iti maipatpatungpal a road construction a para met laeng iti pagimbagan ti publiko.
Maipalagip a ti nasao a proyekto ket narugian a naaramid idi Hunyo idi napalabas a tawen ken nailatangan daytoy iti pondo a P24. 5 million.
