Naituding nga agleppas ti manarimaan a maar-aramid nga overpass sadiay Kilometer 5, La Trinidad inton June 8, 2025.
Iti panakiuman ti Bombo Radyo kenni Jupiter Bacaoat, Engineer 2 iti Department of Public Works and Highways, Benguet 1st District, impanamnamana nga agleppas ti nasao nga overpass iti aldaw ti naituding a pannakaileppas daytoy.
Nopay kasta, naibinglayna nga adda laeng dagiti sumagmamano a parikut a sangsangoen dagitoy kas iti limitado nga espasyo a pagtrabahoan dagitoy ken limitado metlaeng ti working hours dagiti empleyado sadiay.
Innayon ni Engr. Bacaoat, a rabii laeng nga agtratrabaho dagiti workers sadiay manipud iti oras ti alas dyes ti rabii agingga alas singko ti parbangon para iti proteksyon ti publiko partikular ti pedestrian.
Impakaamo pay ni Engr. Bacaoat a ti fabrication dagiti materyales ket maar-aramid sadiay Buyagan, La Trinidad ken maikabit daytoy sadiay Km.5 overpass nu rabii.
Maipalagip a ti nasao a proyekto ket addaan iti pondo a P24. 5 million.//Bombo Genzel Depayso
