BAGUIO CITY – Mapaspasaranen ti oversupply iti nateng kalpasan nga immado ti suplay dagitoy kadagiti trading centers sadiay La Trinidad, Benguet.
Iti interview ti Bombo Radyo Baguio, kinuna ni Agot Balanoy, panakabagi ti liga dagiti asosasyon iti La Trinidad Vegetable Trading Post a nagresulta daytoy iti nababbaba a presyo dagiti nateng no idilig idi Disyembre ti napalabas a tawen agingga idi Enero ti agdama a tawen.
Sigun kenkuana, agarup break even ti presyo ti wombok ken patatas iti wholesale bayat nga adda lugina bassit iti carrots.
Dinakamatna a ti panagadu ti suplay ti nateng ket epekto ti panag-apit dagiti mannalon a nagmula idi Disyembre ken Enero kalpasan dagiti napalabas a bagyo.
Mangnamnamada met a sakbay ti Holy Week ket ngumato ti demand wenno pagkasapulan iti nateng iti baet a naksayan dagiti aktibidad iti end market wenno dagiti konsyumer gapu iti agdama a pandemya.
Imbinglay ni Balanoy nga agingga ita ket bassit paylaeng dagiti maang-angkat a highland vegetables.
