BAGUIO CITY – Naparot ti dumanon 9,000 a puon ti marijuana iti naipatungpal a marijuana eradication sadiay Mount Ngaratngat iti nagbaetan ti Saclit, Sadanga, Mt. Province ken Bugnay, Tingalayan, Kalinga.
Sigun kenni PMajor Bernard Wong, chief investigator ti Mt. Province PNP, nakaawatda ti impormasyon nga adda ti maatap nga agimulmula ti marijuana iti nasao a lugar.
Kinunana a dagos a biniripikar dagiti pulis ti nasao a damag ken iti panagturongda iti nasao a lugar ket sadiay a naduktalanda ti kaadda dagiti iligal a mula.
Dagusda a nangisayangkat ti operasyon ken ditoy a pinarut ken inuramda dagiti pinuon ti marijuana nga aggatad ti agarup P1.8-M.
Nupay kasta, awan ti nadanunan dagiti otoridad nga indibidual iti nakaimulaan dagiti marijuana nga adayo iti ayan dagiti babbalay.
Ikagkagumaan met ti pulisya ti panangilawlawag kadagiti umili sadiay iti manarimaan a kampanya kontra iti iligal a droga. (with Bombo Florence Paytocan)
