Agarup P100 million ti mabusbos a pundo para iti pannakapasayaat ti Benguet State University Strawberry Farm idiay La Trinidad, Benguet.
Bayat ti maika-innem nga Annual Legislative Awareness Week, kinuna ni Councilor Belmer Elis, naaprubaranen ti resolusyon maipapan iti rehabilitasyon ti BSU strawberry farm.
Dinakamatna a ti mabusbos a kwarta ket agtaud iti Tourism Infrastructure and Enterprise Zone Authority (TIEZA).
Sigun pay kenni Elis, manamnama a marugian ti rehabilitasyon ti strawberry farm inton sumaruno a tawen.
Impeksa ti nasao nga opisyal a ti pannakapasayaat ti strawberry farm, maysa metlaeng a maikonkonsidera tourist spot ket makatulong iti turismo nangruna ta mabigbig ti La Trinidad kas Strawberry Capital of the Philippines.
Iti agdama ket manarimaan ti pannaka-iproseso ti Memorandum of Agreement iti nagbaetan ti Benguet State University ken ti lokal a gobyerno ti La Trinidad.
Manarimaan metlaeng ti panangiproseso dagiti local official iti rekomendasyon manipud iti National Economic and Development Authority (NEDA) tapnu maaprubaran ti P100 million a pondo.
Kabayatanna, impeksa met ni Betag Barangay Captain Mona Comila a nakasagana ti opisinana a makitinnulong iti rehabilitasyon ti strawberry farm gapu ta daytoy ti maysa a kangrunaan a bambantayanda tunggal panawen bagyo gapu ta malaylayos daytoy.
