BAKUN, BENGUET – Dumanon iti P130-K ti gatadna a fully grown marijuana plants ti dinadael ti Bakun Municipal Police Station bayat ti marijuana eradication sadiay Lengyatan, Kayapa, Bakun, Benguet idi Abril 16, iti agdama a tawen.
Iti nasao nga operasyon, nadiskobre ti dua a marijuana plantation site nga addaan ti pakabuklan a 130 square meters ken namulaan ti 650 a pidaso ti maiparit a mula.
Dagus met a dinadael dagiti operatiba ti naduktalan a mula kalpasan a naala ti sample para iti qualitative test iti Regional Forensic Unit – Cordillera.
Awan ti natiliw a cultivator.
Sigun kenni PCol. Joseph P. Bayongasan, Provincial Director ti Benguet Police Provincial Office, balligi ti operasyon babaen iti nagtinnulong a puersa dagiti kameng ti pulisya pakairamanan ti Bakun MPS, PIU/PDEU Benguet PPO, Regional Intelligence Unit-14, ken Philippine Drug Enforcement Agency – Cordillera.
Agtultuloy ti nainget a kampanya dagiti kameng ti pulisya kontra iti iligal a droga para iti panakalapped ti panagwaras daytoy.
