BAGUIO CITY – Dumanon iti P142, 000.00 ti gatad ti marijuna brick ken tubular marijuana stalks a nakumpiskar iti insayangkat ti Kapangan Municipal Police Station a checkpoint sadiay Lomon, Paykek, Kapangan, Benguet itay agsapa.
Iti panakiuman ti Bombo Radyo kenni PCI Jim Helario, hepe ti Kapangan PNP, nakaawatda iti tip manipud iti maysa nga informant mainaig iti maideliber a marijuana.
Gapu iti daytoy ket dagusda a nangipatungpal iti checkpoint ken hinarangda ti maysa a jeep a sarsarunoen ti maysa a motorsiklo.
Timmaray ti nakalugan iti motorsiklo isut gapuna a kinamat daytoy dagiti pulis agingga a nakemmeg daytoy agramanen ti kadwana a nakalugan iti jip.
Nabigbig dagiti suspek a da Leo Dominguez Balang, 24, single a tubo ti Kalipayan, Badeo, Kibungan, Benguet ken ni Emil Comila Garcia, 23, single a tubo ti Sapdaan, Santol, La Union.
Nakumpiskar manipud kadagitoy ti maysa a blue travelling bag a naglaon iti siyam a tubular marijuana stalks ken maysa a blue-gray back pack a naglaon iti tubular marijuana stalks ken maysa a brick ti marijuana leaves, malaksid pay iti motorsiklo nga awanan iti plaka.
Kinuna pay ni PCI Helario a nagtaud dagiti nasao a kontrabando sadiay Santol, La Union ken impagnada sadiay Gaswiling, Kapangan tapnu ideliberda kuma sadiay Balintawak ngem na-checkpoint dagitoy sadiay Lomon.
Naituding a maipasidong dagiti suspek iti drug test bayat a dagiti nakumpiskar a kontrabando ket naiturong iti Crime Laboratory.
