Pakabuklan iti P17 million ti inlatang a pundo ti Baguio Flower Festival Foundation, Inc. (BFFFI) para iti maysa a bulan a selebrasyon ti 29th edition ti Panagbenga wenno ti Baguio Flower Festival nga opisyal a mangrugi ita nga aldaw agingga inton Marso a dos.
Sigun kenni Baguio Flower Festival Foundation, Inc. (BFFFI) president Freddie Alquiros ti nasao a pundo ket maaramat para iti pannakasustinir dagiti maipatungpal nga aktibidad.
Inaklonna nga agtultuloy a makaaw-awat ti nasao a foundation iti suporta manipud iti City government ken kadagiti concerned government agencies babaen iti pannakaaramat dagiti parke ken parapubliko a lugar a libre ken dadduma pay.
Iti pablaak ti Baguio City Public Information Office, maipalagip nga insardeng ti City government idi 2020 ti P4 million anual subsidy nga ipapaay dagitoy iti nasao a foundation a suporta para iti pannakasustinir ti tinawen a flower festival activities iti siudad.
Iti baet dayta, nabaelan ti nasao a foundation a nangsustinir metlaeng iti pundo para iti nasao a festival.
Sigun kenni Alquiros, ti tinawan ti pundo para iti flower festival ket maibilang kas mean ken lean no idilig kadagiti pundo para kadagiti dadduma pay a kangrunaan a crowd-drawing events iti dadduma a paset ti pagilian.
Gapu iti dayta, inkeddeng ti Baguio Flower Festival Foundation, Inc. (BFFFI) a nayunan ti prizes dagiti winners iti grand street dancing, drum-and-lyre competition ken ti grand float parade .
Kabayatanna, inlawlawag ni Baguio Flower Festival Foundation, Inc. (BFFFI) Chairman Emeritus lawyer Mauricio G. Domogan a ti sigud a P4 million subsidy manipud iti City government ket P2 million laeng ti magapu iti siudad bayat a P2 million manipud iti national government.
