BAGUIO CITY – Dumanon iti P19.3-M ti gatad ti marijuana sadiay Tinglayan, Kalinga a pinarut ken inuram dagiti operatiba iti las-ud ti tallo nga aldaw a marijuana eradication operation dagitoy a nagleppas idi kalman, September 27.
Nadiskobre dagiti pagmulaan ti marijuana sadiay Barangay Bugnay ken Barangay Tulgao West nga addaan pakabuklan a kalawa a 5,050 square meters.
Pinarut dagiti operatiba ti pakabuklan a 77,000 a pidaso ti fully-grown marijuana kadagiti nasao a disso.
Nasarakan pay iti Barangay Bugnay dagiti dried marijuana stalks nga agdagsen ti 30 a kilo.
Inuram dagiti operatiba dagiti pinarutda a marijuana, pakairamanan dagiti nasarakan a marijuana stalks.
Ti operasyon ket paset ti Oplan Linis Barangay 16 ti PDEA-Cordillera ken Oplan Green Pearl Delta ti Cordillera PNP.
