BAGUIO CITY – Natiliw ti uppat nga indibidual gapu iti panangibiaheda iti marijuana nga aggatad ti minilmilyon a pisos iti deppaar ti Dawaic, Otucan Norte, Bauko, Mountain Province idi rabii kalman.
Nabigbig dagitoy a da Christian Allen Vergara Habab, Aljon James Ambasing Bangayan ken Mark Jamandre nga agpapada a residente ti Santa Cruz, Ilocos Sur ken ni John Randolf Torres Cadavez, residente ti Santa Lucia, Ilocos Sur.
Maibasar iti report, nakaawat ti PDEA-Mountain Province iti impormasyon mainaig iti panangibiahe dagiti suspek iti marijuana babaen iti motorsiklo dagitoy manipud Kalinga ken magnada iti Mountain Province pasubli sadiay Ilocos Sur babaen iti Bessang Pass wenno Tagudin–Cervantes–Sabangan Road.
Dagus met a nangisayangkat dagitoy iti interdiction checkpoint a nagresulta iti panakasitar ti dua a motorsiklo.
Nakumpiskar kadagitoy ti 18 a pidaso ti marijuana bricks ken 9 a tubular marijuana leaves nga agdagsen ti agarup 21.7 kilograms ken aggatad ti nasurok P2.6-M.
Nakumpiskar pay ti dua a motorsiklo nga inaramat dagiti uppat iti panangibiahe dagitoy kadagiti kontrabando.
Iti agdama, sumangsangon dagiti tallo iti kaso a panaglabsing iti RA 9165 wenno ti Comprehensive Dangerous Drugs Act of 2002.
