Idagdagadag dagiti dadaulo dagiti transport groups ti petition dagitoy para iti kanayunan a P2 a minimum jeepney fare gapu paylaeng iti nangato a presyo ti gasolina ken dagiti dadduma pay a gagatangen.
Sigun kenni Pasang Masda president Roberto Martin ituloyda ti petition dagitoy gaputa agkurang ti sigud a minimum jeepney fare.
Gapu iti dayta, kinunana a makipagsinnarak daytoy kenni Land Transportation Franchising and Regulatory Board Chairman Teofilo Guadiz tapno mapagtatalantanan ti petition dagitoy ita a lawas.
Iti kanito a maaprobaran ti nasao a petition, agbalin iti P15 ti minimum fare para kadagiti traditional jeepneys bayat a P17 para kadagiti modern jeepneys.
Kabayatanna, idagdagadagna metlaeng iti Department of Energy tapno imbestigaran ti nangato a presyo dagiti gasolina ken ti panagbaba dagitoy nga iyem-implementar dagiti oil companies.
