Dumanon iti P2 billion ti kasapulan a pundo para iti pannakaibangon ti rangtay kas permanente a solusyon iti nargaay a kalsada idiay Pilando, Lengaoan, Buguias, Benguet.
Iti interview ti Bombo Radyo, kinuna ni Buguias Mayor Ruben Tinda-an nga idi pailaeng a parikut ti nasao a kalsada agsipud ta masansan a margaay ken mairekep tunggal mapasaran ti panagtutudo.
Inlawlawagna a nabayagen a pagsarsaritaanda iti Municipal Development Council ti pakaseknan iti Pilando road nu sadino adda ti insingasing ti barangay Lengaoan a P50 million para iti pannakaisimpa ti nasao a kalsada.
Nupay kasta, impetteng ti Department of Public Works and Highways a kasapulan a rangtay ti maibangon iti nasao a lugar ngem kasapulan ti P2 billion.
Gapu iti kinakurang ti pundo, impeksa ni Mayor Tinda-an a kiniddawda iti maseknan nga ahensiya ti temporaryo nga intervention kas iti pagnaan ti danum bayat nga agkitkitada iti pagalaan iti dakkel a pundo para iti konstruksyon ti nasao a rangtay.
Gapu met iti napasaran a napigsa a panagtudo idi kalman, Agosto 22 ket namingpinsan a nargaay ti kalsada ken saanen a madalyasat pay.
Iti agdama ket transfer ti ar-aramiden dagiti dadduma a van nga agbibiage bayat nga adda met dagiti dadduma a magna kadagiti alternatibo a ruta ngem kasapulan ti kanayonan a plete.
Manarimaan metten ti koordinasyon ti lokal a gobyerno ti Buguias iti opisina ni Congressman Eric Go Yap para iti nasao a pakaseknan.
