BAGUIO CITY – Pinarut ken inuram dagiti otoridad ti P20,000 a gatad dagiti marijuana sadiay Km. 31, Sitio Tokinag, Topdac, Atok, Benguet idi kalman.
Iti interview ti Bombo Radyo kenni PMaj. Zacarias Caloy Dausen, hepe ti Atok Municipal Police Station, kinunana a 100 a fully grown marijuana plants ti pinarut dagitoy iti plantation site nga addaan kalawa a 50 a metro kwadrado a masarakan iti sirok ti sayotean ken 200 a metro manipud iti maysa a balay sadiay.
Sigun kenkuana, awan ti nakemmegda a marijuana cultivator kabayatan ti operasyon ngem agtultuloy ti imbestigasyonda tapnu mabigbig no asino dagiti nagimula kadagiti nadadael a marijuana plants.
Manarimaan met ti agtultuloy a panagsawarda kadagiti kaasideg ti nasao a pagmulaan tapnu maduktalan no adda pay ti dadduma a pagmulaan ti marijuana sadiay.
Dinakamatna a nadiskobre ti nasao a pagmulaan ti marijuana babaen iti naawatda a text message manipud iti maseknan nga umili sadiay.
Naamuan a ti naudi a marijuana eradication sadiay Atok ket idi pay March 1, 2016 ngem sadiay Barangay Pasdong a nagbeddengan ti Atok ken Kibungan.
Patien ni PMaj. Dausen a ti panagmula ti marijuana sadiay Atok ket epekto ti nairtengan ken linawas a marijuana eradication dagiti otoridad sadiay Kibungan ken Bakun a nagresulta met iti panag-ilet ti lubong dagiti marijuana cultivators kadagiti nasao a munisipyo.
Innayonna a gapu iti daytoy ket nagbiruk dagiti marijuana cultivators iti lugar a pagakaranda, nangruna kadagiti lugar a saan a manamnama nga addaan presensia ti iligal a droga kas iti munisipyo ti Atok.
Gapu iti daytoy, kidkiddawenna ti panakitinnulong dagiti umili sadiay iti panakabantay ti munisipyoda tapnu saan nga agsubli ti nagan ti Atok kadagiti munisipyo nga apektado iti iligal a droga.
