Isaksakad ita ni Senator JV Ejercito ti panangdoble iti binnulan a social pension dagiti indigent senior citizen.
Manipud iti P1,000, isingsingasing ti nasao a senador a maipangato daytoy iti P2,000 kas tulong iti kangrunaan a kasapulanda kas iti taraon, agas, ken dadduma pay.
Babaen iti Senate Bill No. 2522, insingasing ni Ejercito a maamyendaran ti Republic Act No. 11916 a mangibilbilin iti P1,000 a binnulan a social pension para kadagiti kwalipikado nga indigent senior citizens.
Sigun kenni Ejercito, saan ngaminen nga umdas ti maysa ribo gapu iti agtultuloy a panagngato ti presyo dagiti taraon, maintenance, agas, healthcare, utilities, ken transportasyon.
Kabayatanna, iti sidung ti nasao a gakat, madutokan ti Department of Social Welfare and Development (DSWD) a mangbigbig kadagiti kwalipikado a benepisyaryo.
Maikat metten ti mannarimaan a requirement a kasapulan a “frail, sickly or with disability” ti maysa a senior citizen tapno agbalin a kuwalipikado ti maysa a senior citizen.
