Inaprobaran iti City Council nga addaan iti kondision ti P23.9 milion a bypass road a mangikonektar iti Barangay Pinget ken West Quirino Hill iti tengnga kadagiti pangta iti epekto daytoy iti Buyog Watershed.
Panggep iti 218 meters a kalsada a mapapartak ti panagresponde kadagiti ambulansia ken bumbero iti walo a barangay a mangnamnama iti Quirino Roas kas kangrunaan a ruta.
Kas kondision, responsable dagiti opisial iti barangay iti pananglapped iti iseserrek dagiti informal settler iti watershed.
Nabilin metlaeng ti DPWH ken DENR a mangimula kadagiti kayo tapno mapagtalinaed ti nabatbati a kabakiran.
Tinubngar iti sumagmamano a konsehal ken environmental advocates ti proyekto gapu iti posible nga epekto daytoy iti Buyog Watershed, nga adda ti nabatbati a 7.2 ektarya a pine forest. Sigun iti DPWH, walo a kayo ti kasapulan a maputed para iti konstruksion.
Numan pay kinuna dagiti opisial a saan a direkta a maapektaran ti suplay iti danum, impaganetgetda ti kinapateg iti panangaywan iti nabatbati a forest cover iti watershed.
