Linapdan ti Bureau of Customs (BOC) ti saan a naideklara a “foreign currencies” nga aggatad ti P24.30 milion manipod iti dua a pasahero iti Ninoy Aquino International Airport Terminal 3.
Sigun iti nasao nga ahensia, $272,000 wenno agarup P15,912,272 ti nakumpiskar manipod iti dua a pasahero a Pilipino idi Enero baente dos.
Idi met Enero baente tres, kinuna dagiti kameng ti nasao nga ahensia a nakumpiskarda ti saan a naideklara a foreign currencies nga addaan iti pakabuklan a gatad a P8,292,166.71 manipod met iti maysa a pasahero a Japanese.
Ti “foreign currencies” ket aggatad ti $43,710, wenno 15,040,000 yen wenno P62,000.
Nangrugi metten ti inquest proceeding para kadagiti nasao a pasahero gapu iti maatap a panaglabasingda iti Customs Modernization and Tariff Act, Manual of Regulations on Foreign Exchange Transactions, New Central Bank Act, ken Anti-Money Laundering Act.
