Impetteng ti Department of Public Works and Highways (DPWH) a naaramat iti naituding a pakausaranna ti P264-milion a rock shed project idiay Kennon Road, Camp 6 sadiay Tuba, Benguet.
Daytoy ket kalpasan nga inawagan ni President Ferdinand Marcos Jr. a “useless” ti pondo a naaramat ti nasao a proyekto, kabayatan ti inspeksion nga insayangkatna itay nabiit.
Sigun kenni Engr. Arnold Dacwag, chief ti Planning and Design Division ti DPWH – Cordillera, dagiti panagreggaay ti daga iti ngato a paset ti proyekto ti nangdadael iti sumagmamano a paset ti nasao a rock shed.
Kabayatanna, kinuna ni Tuba Mayor Clarita Sal-ongan a dakkel ti tulong ti nasao a rock shed iti Kennon Road communities, nangruna no mapasaran ti saan a nasayaat a sasaaden ti panawen.
Impetteng ni Sal-ongan a saan a madalyasat dagiti motorista ti Kennon Road, no awan ti nasao rock shed.
Innayonna a posible nga adu ti reggaay sadiay no awan ti nasao a proyekto.
