BAGUIO CITY – Naituding a mangilako dagiti kameng ti National Irrigation Administration – Cordillera ti P29 tunggal kilo a bagas idiay Wangal, La Trinidad, Benguet inton bigat, Setiembe a trese.
Kagiddan dayoy ti pannakarambak ti SIPAT Day ken ti panagkasangay ni President Ferdinand “Bongbong” Marcos Jr.
Ti maysa a supot ti bagas a mailako ket agdagsen ti sangapulo a kilo ken limitado laeng a magatang daytoy para kadagiti prayoridad a mailakuan.
Iti interview ti Bombo Radyo kenni Liza Jane Challikis, Operations and Maintenance Section Chief ti National Irrigation Administration – Cordillera, dagiti prioridad a mailakuan ken agnumar ket dagiti solo parents, Persons With Disabilities (PWD), senior citizens, ken indigenous people wenno miembro iti Pantawid Pamilyang Pilipino Program (4Ps).
Sigun kenni Challikis, makagatang laeng dagiti nadakamat nga indibidual iti bagas la ketdi addaan dagitoy ti Identification card nga agserbi kas pammaneknek a karaman dagitoy kadagiti nasao a priority groups.
Inlawlawag ti nasao nga opisial a saan a mabalin a maulit a gumatang dagiti nasao nga indibidual kalpasan a nakagatang dagitoy iti maysa a daras nu sadino mabalin laeng a makagatang dagitoy manen kalpasan ti maysa a lawas. Kabayatanna, ti maipatungpal a programa ket resulta ti Rice Contract Farming program ti National Irrigation Administration.
Babaen iti nasao a programa ket gatangen ti nasao nga ahensya ti apit wenno mula dagiti rice farmers a miembro ti Irrigators’ Association rason a mailako daytoy iti nababa a presyo.
Ti programa ket panangsuporta iti panggep ni President Ferdinand Marcos Jr. a mangpasayaat iti agricultural sector tapno magun-od ti food security iti pagilian.
