Dinadael dagiti operatiba manipud iti Kapangan Municipal Police Station (MPS) ti agarup 8,000 marijuana seedlings a nadiskobre idiay Sitio Lod-on, Barangay Gadang, Kapangan, Benguet babaen iti marijuana eradication operation nga impatungpalda ita nga aldaw, Nobyembre 11.
Sigun iti otoridad, nadiskobre dagiti nasao a seedling iti agarup 1,000 square meters a kalawa a lote iti maysa a communal forest iti nasao a lugar.
Dagiti nasao a seedling ket addaan iti mapatta-patta nga Standard Drug Price (SDP) a P320,000.
Dagos met a pinarot ken pinuoran daytoy dagiti operatiba.
Naipatungpal ti nasao nga operasyon iti sidung ti “OPLAN ULTIMATE GRASS CUTTER” ti Benguet Provincial Police Office.
Balligi ti operasyon babaen iti nagtipon a puwersa ti Kapangan MPS, 2nd Benguet Provincial Mobile Force Company (PMFC), Provincial Drug Enforcement Unit (PDEU), Provincial Intelligence Team (PIT) ti Benguet-RIU14, ken Philippine Drug Enforcement Agency-Cordillera Administrative Region (PDEA-CAR).
