BAGUIO CITY-Kinumpirmar ni Department of Transportation ( DOTr)-Cordillera Executive Secretary Atty. Marvin Andaya nga epektibo ita nga aldaw ti panakaisubli ti P35 a flag down rate kadagiti taxi iti rehion.
Inlawlawagna nga idi laeng kalman ket nangipaulog iti pammilin ti Land Transportation Franchising and Regulatory Board (LTFRB)-Central Office para iti panakaipangato iti P40 a flag down rate kadagiti amin a taxi iti pagillian malaksid laeng iti rehion Cordillera a nagtalinaed iti P35.
Nupay kasta, iti Cordillera ket naikkaten ti “less P5” kasaruno ti petisyon ti United Taxi Operators iti rehion.
Inlawlawagna a kabayatan a matingtingiting ti petisyon dagitoy ket nangipaulog iti LTFRB iti “provisional authority” para iti panakaipangato iti lima pesos a flag down rate ken ti panakaikkat ti lima pesos a kessay iti babayadan kadagiti taxi.
Iti baet daytoy, kinunanana a mabalin a mangipila manen iti sabali petisyon dagiti taxi drivers ken operators para iti posibilidad a maipada iti dadduma a lugar ti flag down rate dagiti taxi a dumanon iti kawrenta pesos.
