Pangpanggepen ita ti transport group/association idiay Tuba, Benguet ti kanayonan a P5.00 a pamasahe.
Iti naipatungpal a public consultation idiay Poblacion covered court, Tuba Benguet idi kalman, impeksa ti transport group a marigatan dagituyen gapu ti agsasaruno a panangngato ti presyo ti krudo idi napalabas a bulan.
Sigun iti presidente ti nasao a grupo, nu P80.00 tunggal litro ti krudo mabal-balin pay daytoy a mangsupusup ti inaldaw-aldaw a pagbiyagda ngem nu dumanon daytoyen iti P100.00, marigatan dagituyen.
Inlawlawag dagitoy a ti kanayunan a P5.00 iti pamasahe ket para iti agdama a presyo ti petrolyo. Nupay kasta, apaman a mamonitorda a dumanon ti P110 agpangato ti presyo ti krudo, adda ti posibilidad a mangnayonda pay iti kanayunan a P5.00.
Mainaig ti dayta, impeksa ni Atty. George Fukai, Executive Assistant to the Mayor ken Municipal Legal Officer, naiyumanna metten daytoy iti opisina ti Department of Transportation iti Rehiyon Cordillera no sadinno nabalakadan dagitoy nga agaramid ti request letter.
Inlawlawag ni Atty. Fukai a ti Sangguniang Bayan ti mangiendorse iti surat ngem mailanad iti surat a ti panangingato iti pamasahe ket saan nga inkapilitan nu di ket voluntary laeng kadagiti pasaheros dagitoy.
Kalpasanna, maiwaras ken maiwaragawag ti anyaman a form of communication/publishment ti voluntary fare increase tapno mapakaamuan dagiti communters sakbay a maipatungpal daytoy.
Iti agdama, P19.00 pay laeng ti regular fare manipud syudad agingga iti nasao a munisipyo bayat a P15.00 met para kadagiti seniors ken estudyante ngem manayunanto daytoy iti P5.00 apaman a maiyaplikar ti voluntary fare increase.
Para met iti short trip, mamintinir latta ti P15.00 dagiti regular ken P13.00 para kadagiti estudyante.
Posible met a maipatungpal ti nasao a voluntary fare increase inton umay a lawas.
Kabayatanna, umap-apila met dagiti drivers iti pannakaawat manipud kadagiti commuters ken kinidawda nga awan kuma ti agrekreklamo iti social media.
Kasarunno daytoy iti panagturong ti maysa nga anonymous nga indibidual a nagreklamo iti opisina to Department of Transportation (DOTr) idi nagvoluntary increase dagitoy bayat iti napasaran metlaeng ti energy crisis, nupay naduktalan a saan daytoy a residente iti nasao a munisipyo.
Nagkari met dagiti drivers a ma-cater amin dagiti commuters a residente iti nasao a munisipyo no sadino agpaut latta ti panagbyaheda agingga last trip. Inkarida metlaeng nga anusanda nga ag-express nu atidog ti pila. Nupay kasta, maysa latta kadagiti makitkitada a karit ket ti nailet unay a gunay ti trapiko, rason tapno mabayagan dagiti lugan nu dadduma a makagteng kadagiti terminal.
Iti sabali a bangir, maysa a pakaseknan a dinakamat dagiti commuters ket ti panangpilit dagiti sumagmamano a drivers ken dispatser a kumpletuen ti maximum capacity ti lugan uray awanen ti espasyo gapu iti human size differences.
Nagkari met ti presidente ti transport group sadiay a maiyuman dagitoy kadagiti amin a drivers ken dispatsers iti nasao a munisipyo tapno agbalin a komportable dagiti pasaheros sadiay. //via Bombo Noveh Organo
